Мөнгөн мөнгөн тоосонцор орчлонг бүрхэн гоёод

Маргадын өнгөтэй гэрэлт цохнууд одод дамжин нисээд л

Жингэнэх цовоо дуугаар цэцэгс дохиж бүжээд л

Жир бусын энэ өглөө би дурлалын өнгийг хайлаа.

Алаг зүрх догдлууланхан сандаргадаг

Ая эгшгийн шидэт хувилгаан

Амраг хайрын мөнхийн дуулал

Аяа дурлал чи ямархан өнгөтэй юм бэ.

Үгийн увьдасаар чиний өнгийг олох гэж

Үүр цайтал шүлэглэж үзлээ олсонгүй ээ

Эгшиг аялгуугаар чиний төрхийг харах гэж

Энхрийлэн дуудлаа чи баригдсангүй ээ

Дүрсийн оршихуйд хувилгах гэсэн юм би чамайг

Дурайтал тэгээд харж суух гэсэн өнгийг чинь таахгүй нь

Алсны гэрэлт одод дунд зам төөрчөөд гайхан сууна

Амраг хайр гэдэг чинь ямархуу байдаг юм бол оо

Тагтан дээр сар ширтэн суугаа миний араас

Тэвэрч байгаад чихэнд минь шивнээч энэ тухай

Салхины амьсгалд задрах үсийг минь илбэж байгаад

Сондор болгон зүүгээд өгөөч миний хүзүүнд

Дурлал чамайг би дэргэдээ мэдрэх гэсэн юм

Дэлхийн хамгийн сайхан өнгөөр зурж үзэх гэсэн юм

Үнсэлтийн тэр нууцад нэвтэрч дулаацаж суух гэсэн юм

Үлэмжийн их хайраа дэлгэж бариад бэлэг болгох гэсэн юм.